ស្ថានីយទូរទស្សន៍ថ្មីបំផុត PNN ចាប់ផ្ដើមផ្សាយសាកល្បងជំហានដំបូង
,
ស្ថានីយទូរទស្សន៍ថ្មីបំផុត PNN ចាប់ផ្ដើមផ្សាយសាកល្បងជំហានដំបូង
ស្ថានីយទូរទស្សន៍ PNN ដែលថ្មី និង ទំនើបបំផុតនៅកម្ពុជា បានចាប់ផ្ដើមការផ្សាយសាកល្បងជំហានដំបូងរបស់ខ្លួនហើយ។ ទូរទស្សន៍ PNN ដែលផ្សាយនៅលើប្រព័ន្ធ UHF ប៉ុស្តិ៍លេខ ៥៦ ជាប៉ុស្តិ៍ទូរទស្សន៍បែបកម្សាន្តទូទៅ ហើយប៉ុស្តិ៍ថ្មីនេះនឹងចាប់ផ្ដើមផ្សាយជាផ្លូវការនៅថ្ងៃទី ១១ កក្កដា ខាងមុខ។ ការផ្សាយសាកល្បង ត្រូវគេមើលឃើញនៅទីក្រុងភ្នំពេញ ចាប់តាំងពីថ្ងៃសៅរ៍ ទី៦ ខែមិថុនា មកម្ល៉េះ។ ចំពោះ ១៨ ខេត្តទៀត ត្រូវបានរំពឹងថានឹងអាចមើលឃើញ នាប៉ុន្មានសប្ដាហ៍ខាងមុខនេះ។
ប្រព័ន្ធផ្សាយរបស់ទូរទស្សន៍ PNN មានទីតាំងនៅក្នុងទីក្រុងភ្នំពេញ ខេត្តកោះកុង ស្វាយរៀង ត្បូងឃ្មុំ កំពង់ធំ សៀមរាប បន្ទាយមានជ័យ បាត់ដំបង ប៉ៃលិន ពោធិ៍សាត់ ក្រចេះ ស្ទឹងត្រែង មណ្ឌលគីរី រតនគីរី ព្រះវិហារ ឧត្តរមានជ័យ ព្រះសីហនុ កំពត និងតាកែវ។ បាវចនារបស់ប៉ុស្តិ៍ទូរទស្សន៍ថ្មីនេះ គឺ “សម្រាប់កម្ពុជា” ហើយកម្មវិធីផ្សាយរួមមាន ល្បែងកម្សាន្ត កំប្លែង និង កម្មវិធីកម្សាន្តជាច្រើនផ្សេងទៀត ដែលសុទ្ធសឹងជាកម្មវិធីផលិតដោយខ្លួនឯង។ ជាមួយគ្នានោះដែរ នឹងមានផ្សាយផ្ទាល់ការប្រកួតប្រដាល់ និង កម្មវិធីប្រឡងជ្រើសរើសតារា និងអ្នកមានសមត្ថភាពផងដែរ។ រៀងរាល់ថ្ងៃ ទូរទស្សនិកជននឹងបានទស្សនាខ្សែភាពយន្តភាគថៃ ដែលសម្ដែងដោយតារាល្បីៗ និង កម្មវិធីព័ត៌មាន ដែលផលិតដោយអ្នកសារព័ត៌មានប្រកបដោយវិជ្ជាជីវៈល្បីៗនៅក្នុងប្រទេសកម្ពុជា។
លោក Glen Felgate អគ្គនាយកស្ថានីយទូរទស្សន៍ PNN មានប្រសាសន៍ថា “PNN ផ្ដល់ជូនទូរទស្សនិកជន នូវកម្មវិធីសម្រិតសម្រាំងល្អៗ ដែលយើងគិតថា ជាចំណាប់អារម្មណ៍ចំពោះមនុស្សគ្រប់រូប។ យើងសង្ឃឹមថា ស្ថានីយរបស់យើង នឹងលើកកម្ពស់ស្តង់ដារនៃការផលិតកម្មវិធីក្នុងស្រុកតាមរយៈកម្មវិធីដែលយើងផលិតដោយខ្លួនឯងផ្ទាល់ ហើយទន្ទឹមនឹងនេះ យើងក៏នាំមកនូវខ្សែភាពយន្តភាគថៃល្បីៗបំផុត មកជូនទូរទស្សនិកជនទូទាំងប្រទេសកម្ពុជា ផងដែរ។”
កម្មវិធីកម្សាន្តរបស់ PNN នឹងបង្ហាញជូនដោយពិធីករ ពិធីការិនី ល្បីៗ ដូចជា លោក ប៉ែន ចំរុង អ្នកនាង NG និង អ្នកនាង ខាត់ សុឃីម។ ចំណែកផ្នែកព័ត៌មាន PNN មានលោក ប៉ែន បូណា ដែលអតីតជានិពន្ធនាយកនៅ ស្ថានីយវិទ្យុបារាំងអន្តរជាតិ (RFI) ជានិពន្ធនាយក ។ មិនតែប៉ុណ្ណោះ លោក ប៉ែន បូណា ក៏ជា ពិធីករព័ត៌មានសម្រាប់កម្មវិធីព័ត៌មានពេលល្ងាច ផងដែរ។
លោក Felgate មានប្រសាសន៍បន្តថា “ស្ថានីយទូរទស្សន៍យើងមានសំណាង ដែលមានបុគ្គលិកមានបទពិសោធន៍ខ្ពស់ និង ទទួលបានការគោរពគាំទ្រដ៏ច្រើនមកធ្វើការជាមួយយើង”។ ម្ចាស់ស្ថានីយទូរទស្សន៍ PNN បានចំណាយទុនវិនិយោគជាង ២០លានដុល្លារអាមេរិក ទៅលើការសាងសង់ស្ទូឌីយ៉ូ ក៏ដូចជាឧបករណ៍ទំនើបៗ និងប្រមាណ ១០ លានដុល្លារអាមេរិក ទៀតទៅលើការផលិតកម្មវិធី។ ទន្ទឹមនឹងនេះ ប៉ុស្តិ៍ PNN ក៏អាចទស្សនាបានតាមប្រព័ន្ធ DTV ផងដែរ។
ព័ត៌មានបន្ថែម សូមមើលទំព័រហ្វេសប៊ុក www.facebook.com/PNNTVCambodia
អត្ថបទ៖ ពាណិជ្ជកម្ម